ಉಮಾರ್ ಖಲೀದ್ ಬರೆದಿರುವ ಪುಸ್ತಕದ ಬಗ್ಗೆ ಚರ್ಚೆಗೆ ಅನುಮತಿ ನಿರಾಕರಿಸಿದ ಜೆ ಎನ್ ಯು…

ನ್ಯೂಡೆಲ್ಲಿ : ಸಾಮಾಜಿಕ ಕಾರ್ಯಕರ್ತ ಮತ್ತು ಮಾಜಿ ವಿದ್ಯಾರ್ಥಿ ನಾಯಕ ಉಮರ್ ಖಾಲಿದ್ ಅವರು ಬರೆದಿರುವ ಪುಸ್ತಕದ ಕುರಿತು ಚರ್ಚೆಗೆ ಜವಾಹರಲಾಲ್ ನೆಹರು ವಿಶ್ವವಿದ್ಯಾಲಯವು (ಜೆಎನ್‌ಯು) ಅನುಮತಿಯನ್ನು ನಿರಾಕರಿಸಿದೆ. ಉಮರ್ ಖಾಲಿದ್ ಬರೆದ *‘ಫ್ರ್ಯಾಕ್ಚರ್ಡ್ ಕಮ್ಯುನಿಟೀಸ್: ಆದಿವಾಸಿ ಹಿಸ್ಟರೀಸ್ ಅಂಡ್ ದಿ ಪಾಲಿಟಿಕ್ಸ್ ಆಫ್ ಪವರ್’* (Fractured Communities: Adivasi Histories and the Politics of Power) ಎಂಬ ಪುಸ್ತಕವನ್ನು ಆಧರಿಸಿದ ಚರ್ಚಾ ಕಾರ್ಯಕ್ರಮಕ್ಕಾಗಿ ಮಾಡಲಾಗಿದ್ದ ಸಭಾಂಗಣದ ಬುಕಿಂಗ್ ಅನ್ನು ರದ್ದುಗೊಳಿಸಿರುವುದಾಗಿ ಜೆಎನ್‌ಯು ತಿಳಿಸಿದೆ. ವಿಶ್ವದ ಮೂಲನಿವಾಸಿಗಳ ಅಂತರರಾಷ್ಟ್ರೀಯ ದಿನದ ಅಂಗವಾಗಿ, ಸೋಮವಾರ ಮಧ್ಯಾಹ್ನ 3 ರಿಂದ ಸಂಜೆ 6 ರವರೆಗೆ ಸ್ಕೂಲ್ ಆಫ್ ಸೋಷಿಯಲ್ ಸೈನ್ಸ್ (SSS-1) ಸಭಾಂಗಣದಲ್ಲಿ ಈ ಚರ್ಚಾ ಕಾರ್ಯಕ್ರಮವನ್ನು ನಿಗದಿಪಡಿಸಲಾಗಿತ್ತು. “ಕಾರ್ಯಕ್ರಮಕ್ಕೆ ಸಂಬಂಧಿಸಿದ ಸಂಪೂರ್ಣ ವಿವರಗಳನ್ನು ಬಹಿರಂಗಪಡಿಸದ ಕಾರಣ SSS-1 ಸಭಾಂಗಣದ ಬುಕಿಂಗ್ ಅನ್ನು ರದ್ದುಗೊಳಿಸಿದ್ದೇವೆ” ಎಂದು ಜೆಎನ್‌ಯು (JNU) ಭಾನುವಾರ ‘ಎಕ್ಸ್’ (X) ಖಾತೆಯ ಪೋಸ್ಟ್‌ನಲ್ಲಿ ತಿಳಿಸಿದೆ.

ಜೆಎನ್‌ಯು (JNU) ಒಂದು “ಪ್ರಜಾಸತ್ತಾತ್ಮಕ ಮತ್ತು ವಿಕೇಂದ್ರೀಕೃತ ಸಂಸ್ಥೆ” ಎಂದು ವಿಶ್ವವಿದ್ಯಾಲಯವು ತಿಳಿಸಿದೆ; ಎಸ್ಎಸ್‌ಎಸ್ (SSS) ನ ಡೀನ್ ಈ ಕಾರ್ಯಕ್ರಮಕ್ಕೆ ಆರಂಭದಲ್ಲಿ ಅನುಮತಿ ನೀಡಿದ್ದರು. ನಂತರ ಅದನ್ನು ಅವರೇ ರದ್ದುಗೊಳಿಸುವ ಕ್ರಮ ಕೈಗೊಂಡರು ಎಂದು ಅದು ಉಲ್ಲೇಖಿಸಿದೆ. ಪ್ರೊಫೆಸರ್ ಅವಿನಾಶ್ ಕುಮಾರ್ (ಅಧ್ಯಕ್ಷರು), ಪ್ರೊಫೆಸರ್ ಪ್ರಭು ಮೊಹಾಪಾತ್ರ, ಪ್ರೊಫೆಸರ್ ಉಮಾ ಚಕ್ರವರ್ತಿ, ಶುದ್ಧಬ್ರತ ಸೇನ್‌ಗುಪ್ತ, ಹರ್ಷ್ ಮಂದರ್ ಮತ್ತು ಬನೋಜ್ಯೋತ್ಸ್ನಾ ಲಾಹಿರಿ ಅವರನ್ನೊಳಗೊಂಡ ಸಮಿತಿಯು ಈ ಪುಸ್ತಕದ ಕುರಿತು ಚರ್ಚಿಸಲಿದೆ ಎಂದು ಕಾರ್ಯಕ್ರಮದ ಪೋಸ್ಟರ್‌ನಲ್ಲಿ ನಮೂದಿಸಲಾಗಿತ್ತು. ಈ ಸಭಾಂಗಣದ ಬುಕಿಂಗ್ ಆಗಸ್ಟ್ 7 ರಂದು ಅಂತಿಮಗೊಂಡಿತ್ತು. ಆದರೆ, ಕಾರ್ಯಕ್ರಮದ ಕುರಿತು ಯಾವುದೇ ವಿವರಗಳನ್ನು ಬಹಿರಂಗ ಪಡಿಸಿಲ್ಲ ಎಂಬ ಬಗ್ಗೆ JNU ಸ್ಪಷ್ಟತೆ ನೀಡಿಲ್ಲ. ಧಾರ್ಮಿಕ ಸಂಘಟನೆಗಳು ಕ್ಯಾಂಪಸ್ ಅನ್ನು ಬಳಸಿಕೊಳ್ಳುವುದು ವಿಶ್ವವಿದ್ಯಾಲಯದ ನಿಯಮಗಳ ಉಲ್ಲಂಘನೆಯಾಗಿದೆ ಎಂದು ಪ್ರತಿಪಾದಿಸಿ ಜೆಎನ್‌ಯು ವಿದ್ಯಾರ್ಥಿ ಸಂಘವು (JNUSU) ತೀವ್ರ ಆಕ್ಷೇಪ ವ್ಯಕ್ತಪಡಿಸಿತು. ಇದರ ಪರಿಣಾಮವಾಗಿ, ಕ್ಯಾಂಪಸ್‌ನಲ್ಲಿ ನಡೆಯಬೇಕಿದ್ದ ಇಸ್ಕಾನ್ (ISKCON) ಕಾರ್ಯಕ್ರಮವನ್ನು ಜೆಎನ್‌ಯು ರದ್ದುಗೊಳಿಸಿತು; ಇದಾದ ನಂತರ ಕೆಲವೇ ದಿನಗಳಲ್ಲಿ ಈ ಕಾರ್ಯಕ್ರಮವನ್ನು ರದ್ದುಗೊಳಿಸಿರುವುದಾಗಿ ಘೋಷಿಸಿದೆ.

ಜೆಎನ್‌ಯು (JNU) ನ ಏಕಪಕ್ಷೀಯ ಮತ್ತು ಸರ್ವಾಧಿಕಾರಿ ನಿರ್ಧಾರವನ್ನು ಜೆಎನ್‌ಯುಎಸ್‌ಯು (JNUSU) ಖಂಡಿಸಿದೆ. ವಿಶ್ವವಿದ್ಯಾಲಯದ ಆವರಣದಲ್ಲಿ ಪುಸ್ತಕವೊಂದರ ಕುರಿತು ಚರ್ಚಿಸುವುದು ಶೈಕ್ಷಣಿಕ ಸಂಸ್ಕೃತಿ ಮತ್ತು ಪ್ರಜಾಪ್ರಭುತ್ವದ ಅವಿಭಾಜ್ಯ ಅಂಗವಾಗಿದೆ ಎಂದು ಜೆಎನ್‌ಯುಎಸ್‌ಯು ತನ್ನ ಹೇಳಿಕೆಯಲ್ಲಿ ಪುನರುಚ್ಚರಿಸಿದೆ. ಕಾರ್ಯಕ್ರಮದ ಸ್ಥಳವನ್ನು ರದ್ದುಗೊಳಿಸುವ ಮೂಲಕ ಜೆಎನ್‌ಯು (JNU) ಆಡಳಿತ ಮಂಡಳಿಯು ತನ್ನ ವಿದ್ಯಾರ್ಥಿ-ವಿರೋಧಿ ಮತ್ತು ಬುದ್ಧಿಜೀವಿ-ವಿರೋಧಿ ನಿಲುವನ್ನು ಮತ್ತೊಮ್ಮೆ ಬಹಿರಂಗಪಡಿಸಿದೆ ಎಂದು ಅದು ತೀವ್ರವಾಗಿ ಟೀಕಿಸಿದೆ. ಬುಕಿಂಗ್ ಸಮಯದಲ್ಲಿ ಸಂಪೂರ್ಣ ವಿವರಗಳನ್ನು ಒದಗಿಸಿರಲಿಲ್ಲ ಎಂಬ ಜೆಎನ್‌ಯು ಆಡಳಿತದ ಹೇಳಿಕೆಯು ಕೇವಲ ಒಂದು ನೆಪವಷ್ಟೇ ಆಗಿದ್ದು, ಚರ್ಚೆಯನ್ನು ತಡೆಯುವುದೇ ಅದರ ನಿಜವಾದ ಉದ್ದೇಶವಾಗಿತ್ತು ಎಂದು ಅದು ಆರೋಪಿಸಿದೆ. ಇತರ ಕಾರ್ಯಕ್ರಮಗಳಿಗೆ, ಅದರಲ್ಲೂ ವಿಶೇಷವಾಗಿ ಇಸ್ಕಾನ್ (ISKCON) ಆಯೋಜಿಸುವ ಕಾರ್ಯಕ್ರಮಗಳಿಗೆ ಸಹಕಾರ ನೀಡುವ ಆಡಳಿತ ಮಂಡಳಿಯು, ಈ ಶೈಕ್ಷಣಿಕ ಚರ್ಚೆಗೆ ಸ್ಥಳಾವಕಾಶವನ್ನು ನಿರಾಕರಿಸುವ ಮೂಲಕ ದ್ವಂದ್ವ ನೀತಿ (ಎರಡು ಬಗೆಯ) ಧೋರಣೆಯನ್ನು ಅನುಸರಿಸಿದೆ ಎಂದು ಅದು ಟೀಕಿಸಿದೆ.

ವಿದ್ಯಾರ್ಥಿಗಳ ಕಾರ್ಯಕ್ರಮಗಳಿಗೆ ಕಠಿಣ ನಿಯಮಗಳು ಮತ್ತು ಅರ್ಹತಾ ಮಾನದಂಡಗಳನ್ನು ಹೇರುವ ಆಡಳಿತ ಮಂಡಳಿಯು, ತನ್ನದೇ ಆದ ಬೋಧಕ ಸಿಬ್ಬಂದಿಯ ನೇಮಕಾತಿಯ ವಿಷಯದಲ್ಲಿಯೂ ಅದೇ ಮಾನದಂಡಗಳನ್ನು ಕಟ್ಟುನಿಟ್ಟಾಗಿ ಪಾಲಿಸಿದಿಯೇ ಎಂದು JNUSU ಪ್ರಶ್ನಿಸಿದೆ. ಹಾಲಿ ಕುಲಪತಿಗಳ ಅಧಿಕಾರಾವಧಿಯಲ್ಲಿ ಸಹಾಯಕ ಪ್ರಾಧ್ಯಾಪಕ ಮತ್ತು ಪ್ರಾಧ್ಯಾಪಕ ಹಂತಗಳಲ್ಲಿ ನಡೆದಿರುವ ಹಲವಾರು ಬೋಧಕ ಸಿಬ್ಬಂದಿ ನೇಮಕಾತಿಗಳ ಕುರಿತು, ‘ದಿ ರಿಪೋರ್ಟರ್ಸ್ ಕಲೆಕ್ಟಿವ್’ (The Reporters’ Collective) ಪ್ರಕಟಿಸಿದ ಪತ್ರಕರ್ತ ಅಲೋಕ್ ರಜಪೂತ್ ಅವರ ಇತ್ತೀಚಿನ ತನಿಖಾ ವರದಿಯು ಕಳವಳಗಳನ್ನು ವ್ಯಕ್ತಪಡಿಸಿದೆ ಎಂಬುದು ಎಲ್ಲರಿಗೂ ತಿಳಿದಿರುವ ವಿಷಯವಾಗಿದೆ. ನೇಮಕಗೊಂಡ ವ್ಯಕ್ತಿಗಳು ಉದ್ಯೋಗದ ಜಾಹೀರಾತುಗಳಲ್ಲಿ ನಿಗದಿ ಪಡಿಸಲಾದ ಕನಿಷ್ಠ ಬೋಧನಾ ಅನುಭವ ಮತ್ತು ಪ್ರಕಟಣೆಗಳಿಗೆ ಸಂಬಂಧಿಸಿದ ಅರ್ಹತಾ ಮಾನದಂಡಗಳನ್ನು ಪೂರೈಸುವಲ್ಲಿ ವಿಫಲರಾಗಿದ್ದಾರೆ ಎಂದು ಜೆಎನ್‌ಯುಎಸ್‌ಯು (JNUSU) ಹೇಳಿದೆ. ‘ಜಲ್-ಜಂಗಲ್-ಜಮೀನ್’ (ನೀರು, ಅರಣ್ಯ ಮತ್ತು ಭೂಮಿ) ಕುರಿತಾದ ಆದಿವಾಸಿಗಳ ಹೋರಾಟದ ಬಗೆಗಿನ ಪುಸ್ತಕವೊಂದರ ಚರ್ಚೆಗೆ ಅಡ್ಡಿಪಡಿಸುವುದು ಶೈಕ್ಷಣಿಕ ಸ್ವಾತಂತ್ರ್ಯ ಮತ್ತು ಮುಕ್ತ ಚರ್ಚೆಯ ಸ್ವಾತಂತ್ರ್ಯಕ್ಕೆ ವಿರುದ್ಧವಾಗಿದೆ ಎಂದು ಅದು ಪ್ರತಿಪಾದಿಸಿದೆ. ಸಭಾಂಗಣವನ್ನು ಒದಗಿಸದಿದ್ದರೂ ಮುಕ್ತ ಸ್ಥಳದಲ್ಲಿ ಚರ್ಚೆಯನ್ನು ಮುಂದುವರಿಸಲಾಗುವುದು ಎಂದು ಹೇಳಿದೆ. ಕಲಿಯುವ, ಪ್ರಶ್ನಿಸುವ ಮತ್ತು ಚರ್ಚಿಸುವ ತಮ್ಮ ಹಕ್ಕನ್ನು ಎತ್ತಿಹಿಡಿಯುವಂತೆ ಅದು ವಿದ್ಯಾರ್ಥಿಗಳಿಗೆ ಕರೆ ನೀಡಿದೆ.